دردشة عبريه بسياره كيا

حجي يجلس في المقعد الامامي (بعد عبور سيطرة تفتيش) : والله هاي ماصايرة ..كل هاي السيطرات وماكو فايدة .والله انذبحنه ، شوكت نرتاح ..
• السايق: عمي ياسيطرات كلهم لغافة وملتهين بالبوك ..
• حجية : يمة لحد يحجي عليهم ذولة ولدنا ، شيسون اكثر من هذا ، واكفين بحلك الموت
• حجي اخر: عمي امريكا ام المصايب ، معقولة ماتكدر تكظ الزرقاوي وتخلصنه
• مرة اربعينية : صولاغ راح يكظهم واحد واحد
• الحجي: اي من دبش !!
• شاب يجلس خلف السايق: صولاغ لو بي خير جان حمى اخوه
• الحجي: اني من اشوف صولاغ وصاحبة الثاني بالتلفزيون اكول اشتغل الجذب .قتلنا والقينا القبض وراح نحط خطة امنية جديدة وراح نسوي وراح نسوي وكل قبض ماكو
• حجية كاعدة يم الباب :أكلكم يمة ، هو صولاغ مو ابن بدرية الخنــّة ؟
• الجميع : ههههههههه
• الحجية : لا والله صدك ، بدرية بت شناوة رجلها الله يرحمه ،هم اسمه صولاغ بس ذاك شوية بي نور محمد مو مثل هذا مجولح .
• المرأة : لايمة يا بدرية الخنة .. هذا اجا من ايران متشوفين خلقته الله كالبها .هذا اسمه بيان جبر الزبيدي
• الحجي : لا اسمة باقر جبر صولاغ
• واحد من الخلف : لا حجي اسمه باقر جبر الزبيدي
• الشاب الاول : لا اسمه بيان جبر صولاغ
• السايق: جمعوا الكروة اخوان
• الحجي :والله صولاغ شرطي ما اخليه ، مو وزيرداخلية ..صورة جرجوبة
• الشاب الاول : يمعود هي ظلت على صولاغ على الاقل احسن من ابو الصحة ، ذاك مضمد ما احطه ..جنة علي العيساوي
• شاب يجلس في الخلف : شبي ابو الصحة ؟ ماعاجبك !! لان من التيار الصدري؟
• الشاب الاول : لاعمي اني شكلت .شوكت جبت طاري التيار الصدري .
• الشاب الثاني: اي دير بالك ، مو تكصون بالعالم وتمشون، عبالكم تايهه ،روح زيّن شعرك عدل واحجي
• الشاب الاول: نازل بالله نازل (نزل)
• الحجي : شرد المَغسَول ..لا يا جبان على هل الدكَه،عبالي صدك زلمة
• الحجية: عمي هسه هو شكال.. راساً حطيت الصدر بالنص..ماكال شي وانت اكلته وشربته
• السايق : اخوان اجمعوا الكروة
• الشاب: لا يطلعون دعايات على التيار الصدري ، خل يحترمون نفسهم وينلصمون، مو مزّين حفر وجايني يتنكرز جنة بعيجي
• الحجي: ما بيها شي بوية .. انتم راح تصيرون بالحكومة ، لازم تتحملون حجي الناس .
• الشاب : حجي انت هم شكلك اتطلع دعايات على التيار، منو كلك الصدر راح يشارك بالحكومة؟
• الحجي: نازل عمي نازل..خرب بهل القسمة (نزل)
• الحجية : الحجي هم شطح ، كال اني واني وبعدين اطاها اللهيب ، يمكن منّا للتانكي مال المي محد راح يبقى .
• الشاب: شنو حضرتج تقلدين ؟ عيب حجية انت مرة جبيرة ترى والله ...
• الحجية : نازل يمة نازل ،هاي شلون طركاعة ( نزلت )
• السايق : يابه انت بدل متحجي اجمعنه الكروة الله يخليك
• الشاب : اني مو (سكن) مال الخلفوك افتهمت ، ترى والله احرمك من الشارع
• السايق : استغفر الله هاي شيخلصها .. بابا انت شبيك شمتريك من الصبح
• شابة كانت صامتة: اخوان صلوا عل النبي ، هاي شبيكم الله غاضب عليكم بس تتناكَرون
• الشاب : الله غاضب عليج وعلى الخلفوج، دغطي كذلتج اول مرة وبعدين تفلسفي علينه
• الشابة : نازل عيني فدوة ..عزا العزاني (نزلت)
• السايق للشاب : اسمع لك ترى انت طوختها ، مو عبالك احنا ازواج، ترى هاي سيارتي بخدمة السيّد وكل جمعة اني انقل بيها مصلين للكوفة بدون كروة .
• الشاب : نازل عيني نازل (نزل)
• السايق : الكروة اخوان



الله يعين العراقيين على هالوضع ويا رب تفرج عن قريب

كل هاي السيطرات وماكو فايدة .والله انذبحنه ، شوكت نرتاح ..


مشكور ورده

كل الهلا بيكم منورين شباب

مشكوررررررررررر